در مدح حضرت زینب کبری (س) 5785

در مدح حضرت زینب (سلام الله)

زینب مرتضا نشان نه خلق اولوب نه خلق اولار

اونون مثالی قهرمان نه خلق اولوب نه خلق اولار

جهاندا مفخر زنان نه خلق اولوب نه خلق اولار

بویوردی مصطفا بو قیز اولوبدی زینت پدر

اَیاقینین توزون بونون ملکلر عشقیله ئوپر

باخون حسینه ایلیور بالام نه شوقیلن نظر

اوجالسا گویلره سسی داغا داشا ایدر اثر

بیله حسینه جانفشان نه خلق اولوب نه خلق اولار

حسینه یار مهربان نه خلق اولوب نه خلق اولار

گوزل آدی یقین واریم که هر کسین عزیزیدی

سمکلر التماس ایدور فلکلر اشگ ریزیدی

زبانی ذوالفقاریدی او قدری تیز تیزیدی

بو زینب آدلی لار هامی او زینبون کنیزیدی

مقامینه اونون چاتان نه خلق اولوب نه خلق اولار

عدولرین ایوین یخان نه خلق اولوب نه خلق اولار

گوزونده قانلی یاش بیلون دریتدی دین و مذهبی

دعا ایدر علی قیزی عزالی هر مؤدبی

ئوزی عنایت ایلیر یازاندا من بو مطلبی

ایکی جهانه ویرمرم بو نام نیک زینبی

گره گشادی هر زمان نه خلق اولوب نه خلق اولار

ویروبدی بیزلره اَمان نه خلق اولوب نه خلق اولار

صفا ویروبدی مجلسه چوخ آغلا سنده غم یمه

برات کعبه کربلا ویرر بو اَهل ماتمه

بو گوزیاشون آلار سنون آناسی غملی فاطمه

چاغیر هرایه زینبی بیریندن ائتمه واهمه

ایله عزیزه بی گمان نه خلق اولوب نه خلق اولار

بیلوردی قدرین عرشیان نه خلق اولوب نه خلق اولار

مناده گوردی بیر به بیر ئولوبدی قهرمانلاری

باتوبدی قانه عشقیله او کربلا جوانلاری

اراده ایتدی رام ایده او چولده باغریقانلاری

ایدوبدی زنده کوفه‌ده خانم اوگون او قانلاری

دیوبله بیله خُطبه خوان نه خلق اولوب نه خلق اولار

ویرن بو نوعی امتحان نه خلق اولوب نه خلق اولار

قیامت آشکار ایدوب جهانی یاندران خانم

صفوف لشگری پوزوب یزیدی سیندران خانم

بسات کفری شامیده ئوزی بهم ووران خانم

جماعتی بو نهضته اودم دولاندران خانم

ایله یزیدی سیندیران نه خلق اولوب نه خلق اولار

فساد کاخینی یخان نه خلق اولوب نه خلق اولار

حزین اورکلری ایدن بیلون اونون ملالیدی

یانان دل آختارور تاپا حسینینه عزالیدی

دریندن آه چکمه‌گی جزا گونی مقالیدی

رسالتی جهانیده قالاندی پر مدالیدی

بیله فهیمه قهرمان نه خلق اولوب نه خلق اولار

جهانی حیرته سالان نه خلق اولوب نه خلق اولار

عنایت ایتدی «غمکشه» یازاندا نوحه آغلاسین

هر ایل محرم و صفر باشینا قاره باغلاسین

عزا مجالسی قوروب بو یاسی زنده ساخلاسین

قراسینی گینلرین دلین بو روضه داغلاسین

حسینه ئولمز آغلیان نه خلق اولوب نه خلق اولار

غمینده سینه داغلیان نه خلق اولوب نه خلق اولار

شاعر : مرحوم غمکش