زبانحال حضرت رقیه (س)

زبانحال حضرت رقیه (س)

اولسون کَسیک بو باشین جانلار فداسی عمه

دیداریمه گلوبدور روحیم صفاسی عمّه

هرچند که خرابه آلدی اورک توانین

 ویرمم بهشته ایندی ویرانه نین بیر آنین

صبح و مسا اورکدن عرشه یِتَن فغانین

فیض زیارت اولدی اَجر و بهاسی عمّه

یازدوم سرشکمیله دلداره غملی نامه

گلدی اودور نگاریم ویرانسرای شامه

مرغ دلیم یِتیشدی گر صُون نفسده کامه

چون گوش جانه یِتدی یارین صداسی عمّه

جبراً منی آیردی دلداریدن زمانه

هجران گَتیرمیشیدی بلبل کیمین فغانه

گوز یاشیمی اِئدردیم رخساریمه روانه

دیداره بلکه گَلسون غم آشناسی عمّه

حمد ایلرم خدایه یاری یِتیردی یاره

ای کاش اولمییدی لعل لبونده یاره

قان آغلیور بو یاره بولمم اِئدوم نه چاره

آرتوردی دلده نیسگیل تازه یاراسی عمّه

 قوم دغا غریبه پیشواز اِئدوب قوناقدان

قان سیل تک رواندور دامانینه دوداقدان

واردور یری بو نیسگیل سالسون منی ایاقدان

بی انتها اولوبدور باشدا بلاسی عمّه

کرب و بلا چولونده باتموشدی قانه سوز یوخ

ویرمیشدلار اوچولده هم داش یاراسی هم اوخ

گر سایسالا سایلماز یاره دگوبدی چوخ چوخ

حتماً بو یاره نین وار بیر ماجراسی عمّه

بوسه یرین اِحاطه اِیلوب یوزه آخان قان

بو محنتی اورکده بولمه منه چوخ آسان

 سِیلَم سرشکیمیله من بوسه گاهی الان

وورام دوباره بوسه چون وار صفاسی عمّه

ای کاش گورمییدیم بو غملی وضع و حالی

گویا دوشوب کسوفه گون تک بو مه جمالی

بولدوم نَدن اولوبدور رعنا قَدون هلالی

جسمون اَریتدی محنت قالدی نماسی عمّه

بولدوم نَدن گلردون صبح و مساء فغانه

گوز یاشیوی اِئدردون رخساریوه روانه

باغرین دونوب منیم تک ویرانسراده قانه

بیر دردیدور بو دردین یوخدور دواسی عمّه

بو درد عشقین اولسا هر کیمسه مبتلاسی

عشق اِیلیوب او عشقین جانیم اولا فداسی

محشر گونی اونون من اولام  گره گشاسی

چون عشق لم یزلدور وار حَق رضاسی عمّه

بیر عشقیدور بو عشقه عشق اِِیلرم ازلدن

شیرینیدور زبس که عشق خدا عسلدن

هیهات اَلیم اوزلسون بو عشق لم یزلدن

دنیا فنادی عشقین واردور بقاسی عمّه

عشقیم ز بس که یاره وار دلده بی نهایت

دریا کیمین اورکده موجه گلور محبت

دلده اولان بو عشقه اِیلر بو سوز دلالت

مدتدی اولموشام من غم مبتلاسی عمّه

دلده اولان بو عشقیم عشق شریعتیمدور

بو عشق اورکده شمع راه طریقتیمدی

صد مرحبا بو عشقه عشق حقیقتیمدی

بو واقعیتین یوخ، چون و چراسی عمّه

یوخ سوز که من به ظاهر دنیای بی وفاده

اولدوم اسیر اعدا قالدیم بیله خفاده

درک ایلدیم نگاری ساغرده قانلی باده

وار منده ده شهادت حال هواسی عمّه

دلده غمون (عتیقا) حاشا گله شماره

زایل اولار یِتیشسه اَل دامن نگاره

صدقیله نیّت اِیله یاز مطلعی دوباره

اولسون کَسیک بو باشین جانیم فداسی عمّه

استاد طهمورثی  (عتیق)

منبع مجموعه کانالهای مدح و مرثیه