آخرین مطالب
امکانات وب
در شهادت حضرت امام جعفر صادق (علیه السلام)
و گریز به کوچ از قتلگاه
شاکرم بو عالم هستیده من
اولموشام مشمول فضل ذوالمنن
خلق ایدن گوندن خداوند علیم
ایلیوبدی عبیدینه لطف عمیم
بو فنا دنیاده غرقم نعمته
اعتقادیم وار کتاب و عترته
لِلَّهِ الحمد اولموشام اهل ولا
طینتیمده واردی حبّ مرتضی
چهارده معصومه دلدن عاشقم
سالک راه امام صادقم
کیمدی صادق مظهر حسن ازل
یعنی مرآت جمال لم یزل
کیمدی صادق وصفینه عاجز لسان
نارسا، مدحینده هر شرح و بیان
کیمدی صادق معنی ا..ُ. نور
جلوه گر اوندان تجلّیگاه طور
کیمدی صادق طلعتی رشک قمر
صادق آل محمّد مشتهر
کیمدی صادق هادی جنّ و بشر
آیت کبرای حیّ دادگر
کیمدی صادق عالِم جهر و نهان
ناشر افکار عاشورائیان
کیمدی صادق دلربای عالمین
محییِ فرهنگ مولانا حسین
کیمدی صادق کوه علم و معرفت
ایلیوب مینلر زُراره تربیت
هکذا حمران، اَبان و بوبصیر
این نُعمان و هشام بی نظیر
جابر حیّان او جاوید البیان
علم شیمیده ابر مرد جهان
حافظ مینلر حدیث جانفزا
تیزبین بو حمزه، مرد پارسا
گورمیوب دنیا مفضّل تک قویم
علم دریاسینده غوّاص فهیم
نابغه حسنیّه خاتون دلیر
علم و دانش بیشه سینده شیرگیر
الغرض نجل نبی، پور علی
حضرت صادق خداونده ولی
مدّت عمرینده اول عالی سیر
ایلیوبدی تربیت دورت مین نفر
هر بیری فرزانه و روشن ضمیر
گورمیوب گورمز نظیرین چرخ پیر
حضرت صادق حبیب ذوالجلال
عمر ایدوب دنیاده شصت و پنج سال
گوردی بیر مقطع ده دین دشمنلری
بیر بیرین یخماقلیقا اولموش جری
باشلانوبدی بیر اوزون مدّت قتال
کسب قدرت اوسته ایلولّه جدال
موقعیّت اقتضا ایلور تمام
باشلانا یثربده فرهنگی قیام
نشر اولا دنیاده اُسلوب فلاح
ایتدی دانشگاه دینی افتتاح
تیغ علمیله اوتوز دورد ایل مدام
خدمت ایتدی دین اسلامه امام
دینه خاطر دوزدی چوخلی زحمته
تا یتوردی دینی اوج عزّته
لیک بو عزّت بو جاه بی کران
گلدی منصور شروره چوخ گران
دوشدی بو فکره امامی اُلدوره
دلده کی بغضین جهانه بولدوره
گاهی امر ایلوبدی نصف لیل تار
بی عمامه، بی عبا، ظاهرده خوار
گتدیلر اول حضرتی زار و حزین
محضرینده ساخلادی چوخ دلغمین
ایستدی قتله یتورسون ناگهان
گوردی پیغمبر غضبلی باغریقان
سویلوری ال چک بالامدان بیحیا
وحشتی ایتدی حضرتی قیلدی رها
گه امامین اودلادی کاشانه سین
سالدی خوفه جمله اهل خانه سین
آخِر الامر اول جفاجو و شرور
عُجب و نخوت کانی، چشم قلبی کور
نقشه چکدی نیّت منفوریله
زهر ویردی حضرته انگوریله
زهر مسموم ایتدی پوزدی حالتین
اودلادی اکبادینی اول حضرتین
ایله طاقتدن سالوب آلدی قرار
حجّت حق تاپدی حال احتضار
چخدی جانی باتدی دنیا ماتمه
غصّه یوز ویردی رسول خاتمه
نالیه گلدی ملکلر آغلادی
سس چکوب موسی بن جعفر آغلادی
یثربی دولدوردی آوای فغان
سوگوار اولدی هامی پیر و جوان
شیعه لر سینه زنان دلده انین
ایتدیلر تشییع امامین پیکرین
اوغلی موسی غرق اندوه و محن
غسل ویردی، ایتدی قیمتلی کفن
قویدولار عزّتله جسمین مدفنه
گلدیلر فریاد و داد و شیونه
ای عجب کرب و بلاده بس ندن
اولمادی بیر کس حسینی دفن ایدن
نه تاپولدی باشی اوسته آغلین
غملرین یاد ایلیوب دل داغلین
کوچ ایدنده قتلگهدن کاروان
زینبه اولدی او بیر درد گران
سویلدی ایوای یارالی قارداشیم
وای منیم اِئلدن آرالی قارداشیم
سن اولوبسان قان ایچینده غوطه ور
منده ناچارام ایدم عزم سفر
قویسالار قالّام غمونده آغلارام
لااقل بو اوخ یاراسین باغلارام
«جابری» چوخ طول ویرمه مطلبه
دردیوی دی دخت زهرا زینبه
ناامید ایتمز یقین ایلر عطا
ایسته هیئتله برات کربلا
شاعر : حاج محمد تقی جابری
زبان متن و شاعر: نوحه ترکی, محمد تقی جابری آیینة دل 1069...
برچسب : نویسنده : 8matnenoheh3 بازدید : 199