آخرین مطالب
امکانات وب
احوالات قتلگاه
او اوخ آتان که حسینی اوخا نشان ایلدی
اوخینی آتدی ، گلوب اوخ قلبینی مکان ایلدی
ورولدی ناحق او اوخ، حق گلوب یرین آلدی
صراط حقه یول آچدی، یولی روان ایلدی
بو اوخ او اوخدی، که موسایه طورده دیولوب
خدا اوزی بو اوخین شرحنی بیان ایلدی
بو بیر خدنگیدی اوچ شعبه لی، اوزی مسموم
گورون هارانی نشانه بو اوخ آتان ایلدی؟
حسینی الدورن اول، همین به اوخ اولدی
دیماخ اولور که بو اوخ، قتل ناگهان ایلدی
نجه گلوب؟ نجه دگدی؟ بو اوخ نجه دلدی؟
اصابت ایتماخ همان، ناله قدسیان ایلدی
نه اوخ گوروندی دگن یرده، نه اوخین نوکی
قضا الی بو اوخی گوئیا نهان ایلدی
تلاوت ایلدی ذبح آیه سین، دگنده بو اوخ
اوخون یاراسینه جانیله امتنان ایلدی
حسینی سالدی ایاقدان داخی بو زهرلی اوخ
وجودینی ایله بیتاب و بی توان ایلدی
قاباخ طرفدن اوخی ایستدی ایده خارج
میسر اولمادی هر قدر امتحان ایلدی
تمام مقتله باخسان یازیلا شاه شهید
آت اوسته قدینی اگدی، قدین کمان ایلدی
نه زحمتیله دالی سمتدن چخاتدی اوخی
مجال ویرمدی قان سیل ناودان ایلدی
یخلدی مصرعینه، اوپدی مصرعین اول
اوزینه تکیه گه، الطاف مستعان ایلدی
نکات چوخدی بو اوخدا، ولی دیماخ اولماز
الیمده کلک رقم، شرح داستان ایلدی
باجیسی زینب کبری همین بو معنادن
گلنده قتلگهه شرحنی بیان ایلدی
حسینی بیله معلوم اولور ایتیرمشدی
ایتیردیقین تاپا بیر سمته چوخ گمان ایلدی
بو فکریله دولانوردی ولیک والهیدی
یورولدی دوردی، دوباره دوان دوان ایلدی
یتشدی بیر یره گوردی توکوبله اوخ سنقی
او اوخ سنقلارینی بیر اویان بویان ایلدی
حسینی تاپدی اوزی قویلی بیر چوخور یرده
آناسی فاطمه نی یاد ایدوب فغان ایلدی
چویردی آرخاسی اوسته ازل او گل جسدی
دل آچدی شکره خانم، رو به آسمان ایلدی
دئدی الهی حسینیم بو عهد و میثاقی
یتیردی باشه بو گون سندن استعان ایلدی
دم الستده یا رب رسول عالمیان
بو فدیه نی سنه بیر طرفه ارمغان ایلدی
قبول ایله بو قربانی آل عصمتدن
که حق یولوندا رضائیله ترک جان ایلدی
بو بیر قتیلیدی ، لب تشنه قاننه بویانوب
بو شامیان سو کیمی قاننی روان ایلدی
نه باشی وار نه الی، نه النده بارماقی وار
یارالی نعشنی مثله بو کوفیان ایلدی
آنام عزیزی منیم سویگلی حسینیم دور
باجیسی زینبی بیر عمر باغریقان ایلدی
یارالی عضوینی تک تک ایدوب خانم تفتیش
اورکده سینه ده سانسیز یارانی سان ایلدی
گویون ستاره سیجه گوردی سینه ده یارا وار
باخوب یارالارینا گوز یاشین روان ایلدی
ایکی یارانی خانم آرزو ایدوب اوزینه
اورکده هر ایکی سی نقش جاودان ایلدی
بیری او یاره لرون نحر اولان بوغازیدی
که بو یارا یرینی بوسه اول زمان ایلدی
بیریسی قلبدی که اوخ سوکوب داغتمشدی
باخاندا بو یاریه زینب الامان ایلدی
گون ایسی سی قوری یرده گوروب جسمینی عور
پرند ایدوب ساچین، اول نعشه سایبان ایلدی
حسینینی ایله سوز دلیله اوخشاردی
یانخلی سوزلرینه ناله هر باخان ایلدی
او حالنه خانمون یاندی قلب دشمن لر
تاسف حالنه هر کس فغان کنان ایلدی
بدنده هر یارانی گوردی، اپدی ویردی سلام
هر عضوینه بو سلامی یکان یکان ایلدی
سلام اولا باجی سندان بو نحر منحوره
بو ظلمی قارداشیما رحمسیز سنان ایلدی
سلام اولا باجی سندان بو صدر مکسوره
که آتلارین ایاقی خورد استخوان ایلدی
سلام اولا باجی سندان ایکی کسلمیش اله
منیم حسینیمه بو ظلمی ساربان ایلدی
سلام اولا باجی سندان بو اوخ دگن قلبه
منیمده قلبیمی یاره بو اوخ وران ایلدی
اورک یانور دولوری آتشین مصیبتیله
حسینه غملرینی عرضه لسان ایلدی
صراحتاً ایله بیر اوز دوگلماقین دیمدی
ولی سویلماقینی شمه ئی بیان ایلدی
دئدی گوزوندن ایراق خیمه لر یانان ساعت
ال آچدی غارته، غارت بو کوفیان ایلدی
گورن دیردی بو غارت دگل، قیامتدی
زبسکه ظلمده طغیان بو دشمنان ایلدی
نه قدری خیمه ده منظوریدی اثاث البیت
توکولدی کوفه لیلر ظلمیله تالان ایلدی
آنا بالاسین ایتوردی، بالادا اوز آناسین
گوروب بو حالی او دم ضجه مادران ایلدی
صغیر اوشاق قیز عیالی آلوبدی دوره سین اود
کسیلدی چاره یولی، ناله دختران ایلدی
داغلدی چوللره یکسر کبوتران حرم
یانار اود ایچره دوشوب ترک آشیان ایلدی
دولاندی رشته غارتده سوز دایاندی( بهار)
کمیت طبع اوزون مطلق العنان ایلدی
حسینه دردیوی دئ، هر نه ایسته سن ایسته
وارین یوخون بو حسین بذل مشفقان ایلدی
بو امتیاز بسوندور آناسی زهرانون
سنی حسینه بو عالمده نوحه خوان ایلدی.
شاعر : مرحوم بهار تبریزی
زبان متن و شاعر: نوحه ترکی, بهار تبریزی آیینة دل 1069...
برچسب : 1870, نویسنده : 8matnenoheh3 بازدید : 271