آخرین مطالب
امکانات وب
احوالات حضرت عبدالله ابن الحسن (علیه السلام) در روز عاشورا
ایستورم عمه قویام رزمه قدم دوتما منی
عشقه باخ سینیمه باخما بیله کم دوتما منی
عمومون گلدی سسی بیر هیجان گتدی منه
فرصتیم یوخ ایلیم حالیمی تعریف سنه
عاریدور غیرت اولاد امام حسنه
بیله که شمر قویوب عرشه قدم دوتما منی
مانع اولما منه سن عمه اوزاقدور سفریم
سیندوروب قلبیمی قاسم کسیلوب بال و پریم
او چاتوب مقصده من قالمیشام ای تاج سریم
او گیدن شهره گرک منده گیدم دوتما منی
بوندان آرتیق نه روا باشی اشاقه دولانیم
عمومون کلفتی هر سفره سالاندا اوتانیم
عمودا گیتدی داخی کیمدی الیمدن دوتانیم
سایه سیز قالدی سر اهل حرم دوتما منی
بیر اوشاق که آتانون گورمیه دنیاده یوزین
اوزگه لر وصف ایده سوز دوشسه قاشین یا که گوزین
جان ویرر تا گوره بیر گون آتانین شخصا اوزین
ایستورم جان چیخا جانانی گورم دوتما منی
باخ بو حسرتلی باخان گوزدن آخان گوزیاشیما
باشیمون فکرینی ایتمه منی قوی اوز باشیما
گورسدیم قدرت عشقی آتاما قارداشیما
اوز عمومدان ایلیوم دفع ستم دوتما منی
الغرض قوش کیمی الدن قوتاروب شهپر آچوب
او بلین باغلادی مرگه آناسی معجر آچوب
گوردی بلبل سینه عجب گللر آچوب
شمره اما دیدی ای کینه شیم دوتما منی
یا گوز آچ بیر باشون اوستونده حق داوره باخ
یا اوتان بو ایاقون آلتدا گل پرپره باخ
بوسه گاه لب جان پرور پیغمبره باخ
یا سو ویر یا چکیل ای کان ستم دوتما منی
گوردون اوز میلیوه بو چرخ ایلین گردشی سن
کیمه خاطر ایدیسن بیر بیله ننگین ایشی سن
اوی ویران اونی بوشلا منی اولدور کیشی سن
یولومی گوزلور آتام شاه امم دوتما منی
اوزینی ایسته دی آتسون عمونون سینه سینه
ناگهان دوشدی گوزی خنجرین آیینه سینه
بیر قولین ایتدی سپر دشمن پر کینه سینه
شمر سسلندی غنیمتدی بودم دوتما منی
من گرک فاطمه نون قلبینی ناشاد ایلیم
طویلارین ماتم ایدوب فتنه لر ایجاد ایلیم
بو یاریم گونده بنی هاشمی بر باد ایلیم
موعظه ایلمه ای عقل حکم دوتما منی
باخمادی عقل ایلین موعظیه شمردنی
اندوروب تیغی کسوب شاخه سرو حسنی
دیدی اوخشاتدون عجب اوز عموم عباسه منی
وور بوبیرسی قولیدا ایله قلم دوتما منی
باسدی قولسوز بالانی باغرینا زهرا بالاسی
عرض قیلدی عنو قول دوشدی سیزلدار یاراسی
آخ او عباس عمومون سینمه گلسون قاداسی
ایندی بولدوم نیدوب اول کان کرم دوتما منی
منی قیتر آناما خیمه ده گورسون یارامی
اولدورور کوفه لی میداندا آدامسیز آدامی
همنشین ایلدیم عباس آناسیلان آنامی
ایکی غمدن اولاجاق قامتی خم دوتما منی
بالیا سینه ده ایستوردی اولا حافظ عمو
روحی بیر شهقه چالوب سسلدی یا حافظ عمو
گوردی غیب عالمین عرض ایتدی خداحافظ عمو
بوشلا گلدی آتام ایستکلی ننم دوتما منی
شاعر : مرحوم منزوی اردبیلی
زبان متن و شاعر: نوحه ترکی, منزوی اردبیلی آیینة دل 1069...
برچسب : 1865, نویسنده : 8matnenoheh3 بازدید : 427