آخرین مطالب
امکانات وب
زبانحال امیرالمومنین حضرت علی (علیه السلام)
در شهادت حضرت فاطمه زهرا (سلام الله)
خزان گلدي گلوم سولدي بهاريم گئتدي من قالديم
كناريمدن داخي زيب كناريم گئتدي من قالديم
رخ زهرا سپهر عمرومه تابنده ماه اولدي
محاقه دوشدي ماهيم گوندوزوم شام سياه اولدي
منيله همسفر ياريم رفيق نيمه راه اولدي
كوچوبدور كاروانيم همقطاريم گئتدي من قالديم
تجلّاي رخ زهرايه آخر تنگيدي دنيا
محالي امريدور اولسون قفس جولانگه عنقا
حضيض خاكدن پرچكدي مرغ شاخه ي طوبا
اونيله شوكت و عزّ و وقاريم گئتدي من قالديم
نه تك اوج وفاده سئير ايدن شهبازيدي زهرا
منيم تك شاهبازه شهپر پروازيدي زهرا
حقيقت ملكني تسخير ايدن آوازيدي زهرا
اولان باشيمده تاج افتخاريم گئتدي من قالديم
هزار آواي گلزار وفا گلشندن آيريلدي
نگينيم خاتميندن جور اهريمندن آيريلدي
اميديم عزّتيم روح و روانيم مندن آيريلدي
انيس و مونس ليل و نهاريم گئتدي من قالديم
وجوديم اخذ نور ايلردي هر دم روي ماهندن
شدائده اورك آرام اولاردي بير نگاهندن
او كه آيريلمادي بير دم محبت شاهراهندن
ايله بير آشناي غمگساريم گئتدي من قالديم
دل خاك سيه ده گوهر شهواري گيزلتديم
نهاني دفن ايدوب گنجينه ي اسراري گيزلتديم
رخ گلده جفاي خاريدن آثاري گيزلتديم
مزاره برگ ياس زخمداريم گئتدي من قالديم
او كه مهد ولاده پرورش تاپميشدي نازيله
جهانه فخر ايدوردي هر زمان شاه حجازيله
قوتاردي شمع تك اوز عمريني سوز و گدازيله
اميد خاطر زار و نزاريم گئتدي من قالديم
سزادي باشيم اوسته سالسا بال بوم غم سايه
دريغا اود دوتوب ياندي كول اولدي سودوسرمايه
دوشوب انگشتريمدن لاجرم دُرّ گرانمايه
اليم چخدي بوشا دار و نداريم گئتدي من قالديم
گتورموشدي گُلوم بلبل كيمي بو قلبيمي شوره
او گوندن كه جفا زخمي اُتوردي سينه ي جوره
مبدّل اولدي گوزده روز روشن ليل ديجوره
چراغيم سوندي شمع شام تاريم گئتدي من قالديم
مريض عشق اولان گرچه تمنّاي شفا ايتمز
بلي درد اهلي هر بي درده دردين مبتلا ايتمز
دم عيسا ده اولسا درد هجرانه دوا ايتمز
طبيب رنج و درد بي شماريم گئتدي من قالديم
دوتوب درديله الفت اولموشام مأيوس درماندان
گيدوب جان جهانيم بو جهاندا دويموشام جاندان
تمتّع اخذ ايده حاشا گوزوم سئير گلستاندان
داخي گُل نيلورم بير گلعذاريم گئتدي من قالديم
جهاندا وصل اگر نور اولسا فرقت شام ظلمت دور
اودور كه مرگدنده تلخ تر ايّام فرقتدور
بلي هر عاشقه ياريندن آيريلماق قيامتدور
قيامت قوپدي هجران گلدي ياريم گئتدي من قالديم
دوشوب بو ماجرادن ياديمه زهرا قيزي زينب
سزادي ياندورا خشك و تري بو آتيشين مطلب
باجي قارداشني سالدي يولا عرض ايلدي يارب
قيريلدي تار قلبيم اختياريم گئتدي من قالديم
هواي وصل ياريله حسينيم بي قرار اولدي
ركابندان اوزوم دوتدوم منه بير افتخار اولدي
شريك محنتيم ميدان رزمه رهسپار اولدي
قتاله عزم ايديبدور شهسواريم گئتدي من قالديم
تخيّل عالمنده فكر ايدنده درد هجراني
درون سينه ده احساس ايدرديم زخم پيكاني
وجوديمده بوگون لمس ايلديم بو نار سوزاني
حسينيله داخي خوش روزگاريم گئتدي من قالديم
او كه بير نفحه ي پاكي ايدوب زنده مسيحاني
شراره سينه سيندن ياندروبدور قلب سيناني
آلارديم عطر مويندن شميم زلف زهراني
آنام زهرايه تنها يادگاريم گئتدي من قالديم
حسينون عشقي چون هر قلبده بير كنزدورمكنون
بو كنزون حاجبي نيلور جهاندا ثروت قارون
بيله كنزي اليمدن آلدي ناگه گردش گردون
خزينمدن بو دُرّ شاهواريم گئتدي من قالديم
مريدم من شبيري دور مراديم شعره مطلق
مراديله مريدين شعري عالمده تاپار رونق
يازوبدور بير تخلص شعريمه رونق ويروب الحق
بو لطفيله اوركدن انكساريم گئتدي من قالديم
گَلَر بير گون يتر عمرون باشا((مجنون)) بو دنياده
وئرر ياخشي نتيجه يازديقون اشعار عقباده
سالار بو يازديقون سوزلر سني بو نحويله ياده
كه مجنون تك اديب نامداريم گئتدي من قالديم
شاعر : مرحوم رجایی
!!! لطفا با نام کانال مدح و مرثیه کپی کنید !!!
زبان متن و شاعر: نوحه ترکی, رجائی آیینة دل 1069...
برچسب : نویسنده : 8matnenoheh3 بازدید : 202