آخرین مطالب
امکانات وب
ماجرای ساخته شدن درب خانۀ ولایت
الله منی بیر گوللی گلستاندا یاراتدی
بیر گلشن زیبا و خراماندا یاراتدی
خوش آب و هوا باغیده بستاندا یاراتدی
رشد ایلدی اول گلشن خرّمده نهالیم
خوش طالعی گورستدی منه دست عوالم
توپراقدا ائدوب ریشه می محکم هی اوجالدیم
دورمده اولان گول چیچگی حیرته سالدیم
هرزه گووَرشن اوت ؛ علفین طاقتین آلدیم
برگ و بر آچوب باغیده اولدوم اوجا قامت
وئردیم او گوزل گلشنه بیر اوزگه طراوت
گویلوم کیمی سیر ایلدی ایّام زمانه
قوشلار ائلدی شاخه لریم اوستونی لانه
بلبل لر ائدردی سینه مون اوسته ترانه
گیسولریمی باد صبا شانه لیردی
یارین تئلی تک شانه مه افشان ائلیردی
باغبان منه بیر اوزگه محبّتله باخاردی
چکمیشدی سو آرخی ایاقیم آلتدان آخاردی
غم غصّه سی یاددان منی گورمکده چیخاردی
گوللر باشینا گوللی گلستاندا تاج اولدوم
ایل لر دولانوب کولگه لی بارلی آغاج اولدوم
یاز فصلی گوزل شاخه لریم یاپراق آچاردی
یای فصلی قناری اوتوروب قمری اوچاردی
پاییزده یاپراقلاریمون رنگی قاچاردی
قیش فصلی سووخ دوشجاق همین خوابه گئدردیم
تجدید قوا حکمت داوردن ائدردیم
یئل لر کی اسردی سحر آواز ائلیردیم
اوز حُسنومه مین شیوه ایلن ناز ائلیردیم
تای توشلاریما فخریمی ابراز ائلیردیم
افسوس فلک جور و جفایه باز اولارموش
بو فانی جهاندا بئله خوش گون آز اولارموش
بیر گون ولی چرخی فلکین ترسه دولاندی
عمروم بولاغی خاک ملالیله بولاندی
عبرت گوتور، آز ناز ائله، صددرصد اولاندی
طوفان بلا گلشن آماله اسیلدی
ارّه قویولوب ساقه مه جوریله کسیلدی
کسدیکجه منی ارّه اوجالتدیم گوه فریاد
هئچ کیم یوخودی ایلیه بو بی کسه امداد
محنت گونونون اولمازیموش یولداشی ای داد!
مندنده او گونده دئیه بیللم هامی قاچدی
شاخمده او لانه ائلین قمریده اوچدی
القصّه فلک چوخ منی غملی حالا قویدی
نجّار یولوب قول بوداغیم، ساقه می سویدی
سویدوقجا دئیوردی: نه عجبده اوجا بویدی!
معناده گوزوم آغلادی قان بو قره بخته
دوغراندیم اونون اولدوم الینده نئچه تخته
تسلیم او گون ائتدیم اوزومی دست قضایه
تقدیریمه تا ایلمیم عرض گلایه
صدقیله بلی یعنی دئدیم درد و بلایه
سوز چوخدی دئیم سیزلره اوز دردسریمدن
ال چکمدی نجّار منیم تخته لریمدن
کسدی هره سین اوزگه بیر اندازه ده نجّار
بعضین گوده بعضی سین اوزون ایلدی زنهار
اوست اوسته قویوب سینه مه دوگدی ایتی مسمار
نجّارین الینده تزه بیر شکله قورولدوم
بیرده قوشولوب بیربیره من بیر قاپی اولدوم
بوندان بئله دقّت ائله گفتاریمه امّا
بیلدیم منه نه لطف ائلیوب خالق یکتا
گوردوم منه سویلوللـه در خانۀ زهرا
بختیم گئنه یار اولدی منه بختور اولدوم
حیدر ائوینه بیت ولایتده در اولدوم
من بیر ائوه نصب اولدوم اولوب قبلۀ عالم
هر گون دولاناردی باشیما عالم و آدم
باش گونده چکردی او ائوه حضرت خاتم
جبریل گلنده اول ائوه وجده گلردی
عشقیله ملک لر ائلسون سجده گلردی
من بیر ائوه نصب اولدوم او ائو رشک جناندی
عالملره هم ملجأ و هم دارالاماندی
اهلی او ائوین سرور مخلوق جهاندی
بیر خشتی دگردی او ائوین باغ بهشته
صحنین سوپورردی او ائوین حور و فرشته
بیلدیم هارا نصب اولموشام عالم غمین آتدیم
او گوندن عجب عزّتیلن شوکته چاتدیم
فخر عالمه ائتدیم باشیمی عرشه اوجاتدیم
فخریم بویودی کسب شرافت ائلیردیم
من پنج تنی گونده زیارت ائلیردیم
هر صبح منی لمس ائلیردی شه بطحا
زهراسینی دیدار ائلسون حضرت طاها
عشقیله گلردی قاپونین آغزینا زهرا
من شاهدم اشکین آقا رخساره سَپَردی
گه صورت و گه سینۀ زهرادن اوپردی
سائل سسی هر گون قاباقیمدا اوجالاردی
هر کیم منی امّید عطاییله چالاردی
باب کرم فاطمه دن حاجت آلاردی
دست کرمین کیسه ده محبوس ائلمزدی
زهرا خانیم هئچ سائلی مأیوس ائلمزدی
هر دفعه منی بیر اورگیم ایستین آچدی
دوگمک سسی گلدی یکی از پنج تن آچدی
بیر دفعه خانیم فاطمه، بیر یول حسن آچدی
قلبیم دوتولاندا ولی بو مطلب آچاردی
هر وقت حسین دوگدی قاپی، زینب آچاردی
آل اللهی گورماقلیقا قلبیم دوگونردی
هر کیم منی دوگسیدی اورکده سئونردی
رخسارلرین گورماق همین شعله سونردی
هر چند اولارین شأنینه نالایقیدیم من
امّا او گوزل ئوزلرینه عاشقیدیم من
عشقیم بویودی سیّد الابراری گوریدیم
گوندن او گوزل، مطلع الانواری گوریدیم
قتّال العرب، حیدر کرّاری گوریدیم
حق جلوه سینی گورموشودوم هر بیر ایشینده
غیرت گورونردی او دلیرین یئریشینده
گورموشدوم ائدن وقتده جدال عزمی او سردار
ال قبضۀ شمشیریده اول قامع الاشرار
مرحب لری ویرمیشدی یئره حیدر کرّار
ائتمزدی عدودن ابداً واهمه حیدر
هر حمله ده سسلردی کی «یافاطمه» حیدر
شاعر : ناعمی
زبان متن و شاعر: نوحه ترکی, ناعمی آیینة دل 1069...
برچسب : نویسنده : 8matnenoheh3 بازدید : 220