آخرین مطالب
امکانات وب
در احوالات حضرت موسی ابن جعفر (علیه السلام)
هر دلده وار محبّتی موسی بن جعفرین
بولسون ندور حقیقتی موسی بن جعفرین
فرعونیانِ عصری سالوب حیرته تمام
اعجازِ موسویّتی موسی بن جعفرین
اهل نیازه هر ایکی عالَمده دولتِ
جاویدیدور مَودّتی موسی بن جعفرین
نیلر او قلب رشتهٔ قیدِ علایقی
وار اوندا تارِ اُلفتی موسی بن جعفرین
هر دردین اولسا عرض ایله باب الحوائجه
کَنز و دوادی حضرتی موسی بن جعفرین
ایلوب پیاپی اوّل ذیقعده دن ظهور
بو ایل نچه فضیلتی موسی بن جعفرین
اوچ آیدا اوچ یوزه یتیشیبدور تواترا"
کشفِ کرامت آیتی موسی بن جعفرین
تک بو دگول فضایلی ذکر ایتدیم هر زمان
ظاهر اولوب کرامتی موسی بن جعفرین
بو قدرتِ مماتیدی گور بیر حیاتیده
نه حّددیدی قدرتی موسی بن جعفرین
حق قدرتیدی قدرتی امّا عجب بودور
مغصوب اولوب خلافتی موسی بن جعفرین
شأن و مقامی یاده دوشن دمده هر دله
تأثیر ائدر مصیبتی موسی بن جعفرین
هارون آپاردی حقّینی واضح بوله بوله
وار حقّ مطلقیّتی موسی بن جعفرین
دویموب بو ظلمدن ، دل پُر کینه سینده چون
بی حدّیدی عداوتی موسی بن جعفرین
جبرا" آیردی اوز وطنینن جفائیله
اولدی علاوه کُربتی موسی بن جعفرین
آخر او شاهی گوشهٔ غربتده اون بیر ایل
حبس ائتدی اوز رعیّتی موسی بن جعفرین
زندانِ توبه تو ، گونوزی تیره ، شامی تار
بیر ایل گیچردی ساعتی موسی بن جعفرین
دوشمزدی گون او محبسه اَسمَزدی بیر نسیم
گور نولدی اوندا حالتی موسی بن جعفرین
بوینوندا قیدِ سلسله ، کونده ایاقیده
سلب اولدی استراحتی موسی بن جعفرین
اما علی الدّوام رکوع و سجودیدن
اولمازدی بیر فراغتی موسی بن جعفرین
غربت غمی ، خیالِ وطن ، ظلمِ اشقیا
اولدی انیسِ وحدتی موسی بن جعفرین
یاد ایلدیقجه غربتینی سوزِ آهنون
آرتاردی دیلده حِدّتی موسی بن جعفرین
باشلاردی هر نمازی خضوع و خشوعیله
تا ختم اولوردی طلعتی موسی بن جعفرین
وقت نماز اولونجه گینه باشی سجده ده
خاک اوسته ماه طلعتی موسی بن جعفرین
آنّین یره قویاردی همیشه ، واریدی چون
بو امرینون بیر علّتی موسی بن جعفرین
قویمازدی اگلشیب دورا زنجیر آغیرلیقی
اولموشدی سجده عادتی موسی بن جعفرین
طاقت گیدیب ، وجودی ضعیف اولدی گون به گون
آرتوب زبس مشقّتی موسی بن جعفرین
گه گه چیخاردی بامه که تجدید ایده وضو
اولمازدی استقامتی موسی بن جعفرین
تیترردی برگِ گل تک اسنده صبا یلی
چون قالمامیشدی طاقتی موسی بن جعفرین
هر گون اوروج دوتاردی او رنج و شکنجیله
اولمازدی فوت فرصتی موسی بن جعفرین
هارون بو قدر ظلمه گینه قانع اولمادی
قصدی اولوب هلاکتی موسی بن جعفرین
خرمایه زهر داخل ایدوب گَتدی محضره
سَجّانِ کینه فطرتی موسی بن جعفرین
میل ایتدیریب امامه نچه دانه جبریله
چون گوردی یوخ صرافتی موسی بن جعفرین
اصرار ایدوب گینه او شقی ، سویلدی امام
اولدی داخی کفایتی موسی بن جعفرین
هارون بو ظلمه نادم اولوب که مباد اولا
مسمومیّتده شهرتی موسی بن جعفرین
ایستوب بو ظلمی پرده ده قویسون او دشمنِ
بی رحم و بی مروّتی موسی بن جعفرین
کهنه لباسینی چیخادیب ایتدیلر عوض
اولدی جدید ، کِسوتی موسی بن جعفرین
عالی عمارته گتوروب ، خلقه آندیرا
منظوردور جلالتی موسی بن جعفرین
اشراف شهری دعوت ایدوب بیر طبیبیله
طرح اولدی ذکرِ صحبتی موسی بن جعفرین
سویلوب بیله گمان ایدورم بد گماندی خلق
بیزدندی بو نِقاهتی موسی بن جعفرین
ایلون سؤال اوزونن عم اوغلوم مریضیدور
یوخسا یوخ اوزگه علّتی موسی بن جعفرین
دوردی طبیب ایاقه که ایتسون معاینه
وار هانسی درد علامتی موسی بن جعفرین
ویردی الین طبیبه نشان ، یعنی دردینون
بو الده دور حکایتی موسی بن جعفرین
باخجاق دیدی طبیب بو مسموم اولوب ولی
قالموب طبیبه حاجتی موسی بن جعفرین
یاخشی بولور ندور مرضی بو مریض اوزی
کاملدی علمِ حکمتی موسی بن جعفرین
هارون خجالت اولدی دوروب گیتدی ، سِرّی تا
کشف ایتدی معنویّتی موسی بن جعفرین
مجلس داغیلدی خلق هامو گیتدیلر قالوب
بیر نفسِ با شرافتی موسی بن جعفرین
سند ابن شاهک اولدی قالان ، بیرده چون اونا
دلخواهیدی اذیّتی موسی بن جعفرین
ایتمیشدی غیظیناک اونی چون کشفِ راز ایچون
مجلیسده کی فَطانتی موسی بن جعفرین
دلده کمالِ جرئتیله ناملایمات
دلده خیالِ زحمتی موسی بن جعفرین
رحم ایتمدی او بیکسی بیر درده که سالوب
یوخدور امیدِ صِحّتی موسی بن جعفرین
بیر ظلم ایدوب شل اولموش الیله او تیره دل
تار اولدی ماه صورتی موسی بن جعفرین
ال چکمدی گتوردی گینه مَحبسه ، اولوب
زندانیده اقامتی موسی بن جعفرین
بیر گون مُسیّبه که اونا واگذاریدی
محبسده امرِ خدمتی موسی بن جعفرین
فرمایش ایتدی سنن او دم کی سو ایستیرم
بول چوخ یاخیندی رحلتی موسی بن جعفرین
ایچسم سو پوزسا حالیمی ایتمه داخی سؤال
مشکل اولور اجابتی موسی بن جعفرین
راوی همان او شخصیدی سویلر که بیر گونی
گوردوم کی چوخدی فکرتی موسی بن جعفرین
معلوم اولور که چوخدی بو گون درد و غصه سی
وار یوزده حالِ رقّتی موسی بن جعفرین
من ایستدیم که سِرّین او شهدن ائدم سوال
اولدی جوابه سبقتی موسی بن جعفرین
فرمایش ایلدی که وطن یادینه دوشوب
هم اهلِ بیتِ عصمتی موسی بن جعفرین
فکریم بودور گیدم گورم اهل و عیالیمی
چوخدور اورکده حسرتی موسی بن جعفرین
عرض ایلدیم بو یر هارا یثرب هارا آقا؟
اَبعَددی چوخ ولایتی موسی بن جعفرین
ویردی جواب : کامل ایله اعتقادیوی
وار قوّهٔ امامتی موسی بن جعفرین
ناگه آچیلدی دوشدی یره قید سلسله
تا اولدی بیر اشارتی موسی بن جعفرین
غائب اولوب نظردن او منظور دل منی
حیرتده قویدی غیبتی موسی بن جعفرین
مسئول ایدر منی هارون دون دیر
سَندندی بو رِعایتی موسی بن جعفرین
سن ایتموسن خلاص و گرنه نجاتینه
اولمازدی استطاعتی موسی بن جعفرین
تشویشدیدیم اوندا نه گوردوم که سسلنور
زنجیرِ طوقِ ذلّتی موسی بن جعفرین
سالدی الیله بوینونا زنجیرینی ، منی
فارغ دل ایتدی رَجعتی موسی بن جعفرین
سویلوب کی منن اوتری سیاست اولا سنه
اولماز بونا رضایتی موسی بن جعفرین
اوچگون گیچوب سو ایستدی بولدوم کی دیلده وار
سوزِ عطش حرارتی موسی بن جعفرین
سو ویردیم آلدی باخدی ایله یأسیله سویا
گویا که وار ندامتی موسی بن جعفرین
عرض ایلدیم آقا نیه میل ائتموسن سوئی؟
آرتدی داخی ملالتی موسی بن جعفرین
سویلوب نجه ایچیم سویی خاطر نشان اولوب
جَدّی شهِ شهادتی موسی بن جعفرین
جان ویردی سو یانیندا حسین تشنه لب ، نجه -
اولسون سو میل و رغبتی موسی بن جعفرین
راوی دیر که خواه نخواه ایچدی سو امام
گوردوم پوزولدی حالتی موسی بن جعفرین
گه یاشیل اولدی رنگِ شریفی گهی اولوب
رنگینده صَفرویّتی موسی بن جعفرین
ناگاه ظاهر اولدی جوانِ مَلَک صفات
وار اوندا شکلِ هیئتی موسی بن جعفرین
چوخ بنزر اولغریبه یقین ایلدیم اودور
دلبندِ پاک طینتی موسی بن جعفرین
آغلار گوزیله بیر بیرینی ایتدیلر وداع
گیتدی او مهر خلصتی موسی بن جعفرین
چکدی عباسین اوستونه بولدوم یتوب باشا
عمرِ حیاتِ مدّتی موسی بن جعفرین
ذکرِ شهادتینیله یتدی قولاقیمه
کلماتِ با فصاحتی موسی بن جعفرین
هارون ائشیتدی تا وطنِ اصله عزم ایدوب
باشه یتوبدی غربتی موسی بن جعفرین
یرده قویوب او نعشی شکاره گیدوب اوزی
قصدیدی چون اهانتی موسی بن جعفرین
زنداندا ذلّتیله قالوب اوچ گون اوچ گیجه
نعشِ قرینِ عزّتی موسی بن جعفرین
گلدی شکار گهدن او دل مُرده سویلدی
وار دفنی نون ضرورتی موسی بن جعفرین
وَهن اوزره اولدی اوچ نفر حمّاله واگذار
تدفینونون کفالتی موسی بن جعفرین
یردن جنازه نی گوتورن دمده گوردولر
مانعدی نَقله ثِقلتی موسی بن جعفرین
تا چکدیلر کناره عبانی نه گوردولر
وار ثِقلتینده علّتی موسی بن جعفرین
جان تاپشوراندا کونده و زنجیری آچمیوب
مأمورِ با شقاوتی موسی بن جعفرین
قیدی آچوب قویولدی او تابوتِ کوتَهه
نعشِ بلند قامتی موسی بن جعفرین
باش سمتدن آخوب باش ، ایاق سمتدن ایاق
نسگیلیدور بو محنتی موسی بن جعفرین
تابوتونون گیدردی مُنادی قباقجه
دلده خلافِ مِدحتی موسی بن جعفرین
قدحیله نسبتی که ویروردی او سَروَره
اصلا یوخیدی نسبتی موسی بن جعفرین
تا اینکه آگه اولدی سلیمان قضیّه دن
تأثیر ایدوب مَذّلتی موسی بن جعفرین
نعشی آلوب دیدی گرک اولسون بو شهرده
اثباتِ افضلیّتی موسی بن جعفرین
امر ایتدی جار چکدی منادی ، که کشف اولا
بغدادیانه رحلتی موسی بن جعفرین
تشییعه حاظر اولسون او که اعتقادیدور
حقّیّیتِ ولایتی موسی بن جعفرین
پاک اوغلی پاک دفننه گلسون او کس که وار
بوینوندا عقد بیعتی موسی بن جعفرین
اوّلده اهل بیتینه امر ایلدی گلون
یوخدور یانیندا عترتی موسی بن جعفرین
دوره ویرون بو نعشه دویونجا بیر آغلیون
تا اولماسون حقارتی موسی بن جعفرین
سس دوشدی شهره حاضر اولوب شیعه لر تمام
کثرت تاپوب جماعتی موسی بن جعفرین
شَطّین کنارینه یتوروبلر جنازه سین
اشیاع خوش عقیدتی موسی بن جعفرین
غسلین اگر چه ویرمیشیدی اوغلی باطنا"
معلومیدی وصیّتی موسی بن جعفرین
ظاهرده ده اولوب عمل آدابِ میّته
منظور اولوندی حرمتی موسی بن جعفرین
(ذهنی) بسوندی گر اولا دیوانِ حشرده
الده بو غم کتابتی موسی بن جعفرین
هجری حسابی مین اوچیوز اَلّی مهِ صفر
نظم اولدی بو روایتی موسی بن جعفرین.
مرحوم ذهنی
مجموعه کانالهای مدح و مرثیه
آیینة دل 1069...برچسب : نویسنده : 8matnenoheh3 بازدید : 176