آخرین مطالب
امکانات وب
زبانحال, حضرت رقیه (سلام الله)
بیر عمر انیسیم غُل و بند و رَسَن اولدی
آخر منه یارب بو خرابه وطن اولدی
گَتدی قولی باغلی بو دیاره منی دشمن
دوزدوم نقدر سالدی فشاره غل و آهن
همدم گونوز اولدی منه ناله ، گیجه شیون
چوخ ظلم منه گاه نهان گه عَلَن اولدی
جمعیّتیمون فکری منی ایتدی پریشان
قالدیم یوزی دیواریده پژمرده و گریان
بو شامیده یارب یوخودی بیرجه مسلمان؟
ویرماقه تسلّی نه گلن نه گیدن اولدی
بو شام هارا من هارا ای خالقِ داور؟؟
ظاهرده اگر چه گتوروب قوم ِستمگر
باطنده چکوب جذبهء عشق ِعلی اکبر
علّت بو اسارتده او وجهُ الحَسن اولدی
عالِمسن اوزون منکه غریبم وطنیم یوخ
گلشن پوزولوب غنچه گل و یاسمنیم یوخ
بیر بلبل ِپر بسته و بالم چمنیم یوخ
ظلمیله خزان کرب وبلاده چمن اولدی
شهزاده یم امّا قوری یردور منه مسکن
توپراقدا یوزوم یولدا گوزوم دوره ده دشمن
سالدی منی اکبر غمی ویرانه ده دلدن
نه گلدی نه بیر کیمسه یانیندان گلن اولدی
دیواره قویوب یوز گیجه گوندوز قوری یرده
گوزدن توکرم خونِ جگر عارضِ زرده
بو شهرین اهالیسی گتوردی منی درده
بی‌حد کنه بو یرده اذیّت ویرن اولدی
دویدوم دیریلیقدان من اَیا قادرِ غفّار
ویرّم قسم اجدادیمه ئولدور منی قورتار
قالدوقجا یتر غصّه مصیبت لریم آرتار
صبریم آزالوب بسکه هجوم ِمحن اولدی
هر کیمسه یتیم اولسا قولون دشمنی باغلار؟
غم سوزشی هر گون منی بیر نحویله داغلار
من آغلارام احوالیمه عمّم آنام آغلار
غمدن دُرِ اشکیم چو عقیقِ یمن اولدی
سلطانِ حجازین قیزی کشف ایلدی رازین
قورتاردی خدائیله اولان راز و نیازین
جان ویردی ، ویروب آخره اوز سوز و گدازین
نه دردیله ئولدی دیمه دردین بولن اولدی
ای بادِ صبا دوشسه یولون کرب و بلایه
عرض ایله (حسینی) دیلیجه میرِ هدایه
ای نعشی قالان یرده ، گیچن باشی جدایه
ویرانه دونوب رشکِ بهشتِ عَدَن اولدی
بیر گُل که سووَردین اولا او زینتِ گلشن
هند اوغلی سووَردی اولا بندِ غل و آهن
گَل شامه یتوب عُمده ی آمالینه دشمن
اوز سویگولوی گور نجه دشمن سووَن اولدی
سن تک اودا جان ویردی یارالی ، قوری یرده
زینب باخوب اول حاله گلوب خاطری درده
بیر سلسله ده اولمادی بیر ساتِر و پرده
آخر کفنی پاره لنن پیرهن اولدی
زیبنده دی دونسون گوزومون بارشی ابره
سالسون شرر ، آهیم اودی معموره ی صبره
اگنینده اولا کوینگیله قویدولا قبره
ویرانه مزار اول اریمیش بیر بدن اولدی
ایتدی اونا بیر آیری کفن عترتِ اطهار
گورموبدی اونون مثلینی بو گنبدِ دوّار
رخساره سالوب زلفِ پریشانی خانملار
ویرانه گلستانِ گُلِ یاسمن اولدی
هر کیم باخوب احوالینه توکدی یوزه قانیاش
هر قیز دولانوب باشینه جسم اوسته سالوب ساش
فکر ایلسه حالین یانار ، اولسا دل اگر داش
دشمنده باخوب یاندی دیمه بیر گولن اولدی
گُل یوزلیلر افسرده لنوب گُل کیمی سولدی
فریاد و نوائیله خرابه یری دولدی
عمّه ، آنا ، باجی ، باش آچوب گُل کیمی سولدی
اول بیکفنه زلفِ پریشان کفن اولدی
(سعدیّ زماندور) بو (حسینی) سنه بیر ایت
قربانون اولوم قووما خانم سویلمه چیخ گیت
وار دردِ نهانیم نظرِ لطفیله لطف ایت
تئز دوشدوم ایاقدان ولی بولمم ندن اولدی
فکریم بودی درک ایتمیه حالا منی رحلت
چوخ عمر ایلیم چوخ اولا مندن سیزه خدمت
بیرده من ِبیچاره ده وار شوق ِزیارت
هر چند مخالف منه دورِ زَمَن اولدی.
مرحوم حسینی سعدی زمان
منبع مجموعه مدح و مرثیه
آیینة دل 1069...برچسب : نویسنده : 8matnenoheh3 بازدید : 180